إخــلاء مسؤوليـــة

الواجب انك لا تعديت الحدود ..وطفتها
اقل حاجه تحترم نفسك وتحشم جيتي


جوانبي الاخرى ترى للحين ما قد شفتها
فالافضل انك تتقي شري.. وتآمن سيتي


كنت احسب انك فاهم لشخصيتي وانصفتها
اثرك الين اليوم ما انت فاهم لشخصيتي


اجل ..الآعيبك اذا وياي .. ما خففتها
عقليتك وشلون ترقى لمستوى عقليتي؟


يا هي كثير اشياء صارت منك ما استلطفتها
اقلها كذبك... وانا في عز مصداقيتي


واخطاء لا يمكن تطوف ..برغبتي طوّفتها
حتى ابين لك مدى صدقي وطيبة نيتي


يا خي انا كل المشاعر لجلك استنزفتها
وانت فبرودك للاسف قتلت رومانسيتي


حتى احاسيسك عشاني ما بعد كلفتها
ما كنك انت اللي ورا تحطيمك لنفسيتي


اطالب بكامل حقوقي منك وانت اجحفتها
تقول كني من( البدون)اطالب بجنسيتي


خليتني مصدوم فيك.. وهقوتي اخلفتها
واصبحت فاقد شئ من طبعي وتلقائيتي


يعني ترى عفويتي من تحت راسك عفتها
مع اني واحد دوم احب اتعامل بعفويتي


لكني اتلفت العلاقه ..مثل ما اتلفتها
ما دام انسانيتك.. ما هي لانسانيتي


ابشر وانا اللي دمعتي لليوم ما كفكفتها
اني لأعلمك البكا واثبت لك استاذيتي


واجعلك قصه من صميم التجربه الفتها
دفعت فيها كبرياء احساسي وحنيتي


صدقني حاولت آتغاضى والعواقب خفتها
لكني أخشى لو تطيح بناس من نوعيتي


احساسها مرهف ولو حاولت واستهدفتها
ماني بساكت وانتبه من سخطي وسلبيتي


افعالك اصلاً لامست شخصي وانا صرفتها
وشلون اصرفها اذا هي لامست قوميتي؟


تستاهل انك تنجحد من ناس ما شرفتها
وأول ترددت اجحدك.. والحين بامكانيتي



ما دامك اتعديت وياي الحدود ..وطفتها
غسلت يدي منك ..واخليت مسؤوليتي